QB BBC радиосына сұхбат берді

Кешке үй телефоным шыр ете қалды. Тұтқаның ар жағынан: “Сәлеметсіз бе? Біз сіздердің қазақ тілінде блог дамытуға үлес қосып жатқандарыңызды естідік. БиБиСи-дің Орта Азия елдерінің қызметі Қазақстандағы жаңа медиаға байланысты радио бағдарлама әзірлеп жатыр. Осыған орай Сіздермен кездессем деп едім” деген дауысты естідім. Сөйлеп тұрған Луиза екен (суретте).

Ол БиБиСидің Орта Азия елдерінің бөлімінде қызмет етеді. Еуропадағы Қауіпсіздік және Ынтымақтастық ұйымы Орта азия елдеріндегі БАҚ-тардың өзін-өзі басқару мәселесіне қатты көңіл бөліп жатыр екен. Осыған орай БиБиСи бұл мәселеге басқа қырынан келуге тырысыпты. Сөйтіп жаңа медияға тоқталыпты. Қазақ блогшыларынан (QB) Қуаныш екеуміз бодық. Бақытгүл белгілі бір жағдайларға байланысты келе алмады.

Луиза бізге:

• Не себепті блог бастадыңдар?
• Блог шынымен де қазақ қоғамына көмектесе ме?
• Жаңа медиа берген еркіндік салдарынан қоғамда ұлтараздық, дінараздық мәселелер туады деп ойламайсыңдар ма?
• Қазақ тілінде блогты дамыту не үшін маңызды? т.б.

сауалдар қойды. Біз өз пікірімізді айттық. Ал егер Луиза Сіздерден сұраса, не деп жауап берер едіңдер?

P.S. Хабар эфирге берілген соң, Луиза бізге сілтемесін жолдаймын деп уәде берді.